Thursday, January 21, 2016

ထင်တလုံး


ဒီစားသောက်ဆိုင်ဟာ ခမ်းနားလှတာမဟုတ်...
အထူးအဆန်း သဘောကျလှသော လူအများကို
အဆန်းတပြား ခံစားချက်ကိုသာ အဓိကထားပေးမယ့်ဆိုင်...
အညာဓလေ့ရယ်လို့ ဒေသ ဟန်ပန် အပြင်အဆင်နဲ့
လမ်းမတန်း သစ်ပင်အောက် ကွပ်ပြစ်တည် 
ကွပ်ပြစ်အလယ် စားပွဲဝိုင်းချ  ကွပ်ပြစ်ပေါ် ဝိုင်းထိုင်ကြဖို့
ကတ္တီပါအခင်းနဲ့ မှီအုံးနဲ့ ထိုင်စရာ နေစရာ အကျအန
ပြင်ဆင်ချထားတဲ့ လေဟာပြင်စားတော်ဆက်တစ်ခုသာ...
ဂုဏ်ဆာတဲ့ လူသူကြွယ်များ သူတို့ အသိုင်းအဝိုင်းကြားမှာ
ပေါ်ပြူလာဖြစ်စေကြောင်းနဲ့ စေတနာ သဒ္ဒ္ဓါတရား ထက်သန်လှပါကြောင်း
သုံးနိုင် စားနိုင် ကျွေးနိုင် မွေးနိုင် ပျော်ပါး မော်ကြွားနိုင်ပါကြောင်း သက်သေပြစရာ
ကိန်းကြီး ခန်းကြီးနိုင်လှစွာသော လူဂုဏ်တန်များရဲ့
မြင်ရခဲလှသော ဟန်ဆောင် ပန်ဆောင် ရိုးသားပြမှုများကို
တစေ့တစောင်း မြင်တွေ့ခွင့်ရနိုင်သော စားသောက်ဆိုင်...
တောစာ တောင်စာ အညာစာများဟု ကင်ပွန်းတပ်သော်ငြား
အင်မတန် ဈေးကြီးလှသော စားဖွယ်သောက်ဖွယ်များကို
တခုတ်တရနဲ့ ရက်အတော်များများ ကတည်းက
ဘယ်နှစ်ယောက်စာ ဘယ်နှစ်ဝိုင်းစာကို ငွေလမ်းခင်း 
ကြိုတင်အော်ဒါပေး မှာကြားထားမှသာ ရနိုင်သောဆိုင်...
ဆိုင်ရဲ့အဓိကဖေါက်သည်များဟာ လူဂုဏ်တန် အသိုင်းအဝိုင်းကြားက 
ဂုဏ်ရှိ သရေရှိ အဆင့်ရှိ အတန်းရှိလို့ ခံယူချက်ရှိထားကြတဲ့ လူသားများ...

အလယ်စားပွဲဝိုင်းပေါ်က ပန်းကန်ပြားထဲ စားချင့်စဖွယ် လှလှပပ ပြင်ဆင်တည်ခင်းထားတဲ့
တောကြီးမြွေဟောက် ဟင်းလျာရှိမယ်...
မျောက်ချေးခါးနဲ့ ဆတ်ပေါက်သားချက်
တောကြက်မဒန်းကင် သမင်ပေါက်ဝမ်းပြင်းသား 
ချိုးကြော် စနိုက်ကြော် စာကလေးကြော်များကို 
လျှာရင်းတမြက်မြက်နဲ့ စည်းစိမ်ခံ
အရိုးပါမချန် အားပါးတရ မြိန်ရေယှက်ရေ တကြွပ်ကြွပ် ဝါးနေကြရင်း...
အကောင်းစားလဘက်ခြောက်နဲ့ နှပ်ထားတဲ့ 
လဘက်ရေ ခါးခါးအရသာကို တစိမ့်စိမ့်ခံစားရင်း...
အော်ဒါရှိမှရနိုင်တဲ့ အညာထန်းရေစစ်စစ်ရဲ့ 
ချိုမြရှတသော အရသာကို လျှာရည်စိမ့်အောင်ကျိုက်ချရင်း...
စားသောက်ဝိုင်းထဲက လူဂုဏ်တန် တစ်ယောက်ဟာ
အစားအသောက်များ သိပ်အရသာရှိလှကြောင်း ချီးကျူးစကားနဲ့ 
အပြုံးခပ်ပါးပါးတင်ထားတဲ့ မျက်နှာနဲ့ မာန်ပါပါနဲ့ ဟန်ရေးပြနေရင်း...

မလှမ်းမကမ်းက မြေပြင်မှာ အားကျစွာ မျှော်လင့်စွာ 
ငံ့လင့်ခြင်းမျက်ဝန်းများနဲ့ တအုပ်တမ ဝိုင်းဖွဲ့လို့
 ငေးမောကြည့်နေရှာကြတဲ့ သူဖုန်းစားကလေးတွေကို မျက်လုံးတချက်လှန်ကြည့်ရင်း...

လူသားတွေကြားက မတူညီကြသော ကံအကြောင်းတရားတွေအကြောင်းစဉ်းစားနေရင်း...

တော်တန်ရုံဆိုင်မှာ မှာကြားစားသောက်လို့ ရနိုင်ခဲလှသော ဟင်းအမယ်များကို အရသာခံစားရင်း...

မျက်နှာပေါ်မှာ အရာရာကို ဂရုမထားတဲ့ ဥပက္ခာတရားကိုဆင်
အားလုံးကို ကြားစေ့ချင်ဟန်နဲ့ ချောင်းတချက် မာန်ပါပါဟန့်ရင်း... 
စကားသံကို အတန်ငယ်မြှင့်တင်ရင်း...
မျက်လုံးများက ဘေးဘီဝန်းကျင်ကို အကဲခတ်ရင်း...

တည်ငြိမ်တဲ့ အသွင်ယူလို့ ဣနြေ္ဒ့ရှင်ဟန်နဲ့ ဆရာသမားက
ဝိုင်းထဲက မိတ်ဆွေများကို စကားစသလို တရားပြသလို...

လူသားတွေမှာရှိအပ်သောကျင့်ဝတ်နဲ့ ပြုလုပ်အပ်သောဝတ္တရားများအကြောင်း...

စောင့်ထိန်းအပ်သော သီလနဲ့ ကျင့်သုံးအပ်သော ကိုယ်ကျင့်တရားများအကြောင်း...

လောဘ၊ ဒေါသ၊ မောဟ၊ မာန်မာနနဲ့ မေတ္တာတရား စာနာမှုတရားတွေအကြောင်း...

သည်းညည်းခံခြင်းနဲ့ တင်းတိမ်ရောင့်ရဲခြင်းတို့ရဲ့ မြင့်မြတ်ခြင်းအကြောင်းတရားတွေအကြောင်း...

အစားတလုပ် တရားတပုဒ် လျှာအမြှုပ်ထွက်မတတ် အားပါးတရ ပြောကြားနေရင်း... 
မြင့်မြတ်လှသော လူဂုဏ်တန်ဟု မိမိကိုယ်ကို ခံယူချက်ရှိထားသောသူက
မလှမ်းမကမ်းမှာ ပါးစပ်အဟောင်းသား စူးစိုက်အားကျသော အကြည့်များနဲ့ ငေးမောနေကြရှာသော
ဤမျှနိမ့်ပါး ဆင်းရဲနုံချာလှသော ပညာဝေးသည့် သူဖုန်းစားငယ် ကလေးများကို
၎င်းတို့တသက်တာမှာ ကြားခွင့်နာခွင့်ရခဲလှသော ဤကဲ့သို့ ထူးမြတ်လှသည့် အသိတရားများကို

သွယ်ဝိုက်သော နည်းလမ်းအားဖြင့် သူတို့လေးတွေ မကြားကြားအောင် 
မိမိက မသိမသာ ရှင်းလင်းပြောပြ သင်ကြားခွင့်ရရှိခြင်းအတွက်

မိမိကိုယ်ကို ပညာကြီးမား မြင့်မြတ်လှသောသူတစ်ယောက်အဖြစ်
ဝမ်းမြောက်ပီတိဖြစ်စွာ ကျေနပ် ဂုဏ်ယူစိတ်များ တဖွားဖွားပေါ်ပေါက်ရင်း…။


» » » » » ◘◘◘ « « « « «

အမြဲတမ်း ငြိမ်းချမ်းကြပါစေ။
Related Posts Plugin for WordPress, Blogger...