Thursday, April 19, 2012

ခမာ တို့ရဲ့ နှစ်သစ်ကူးပွဲတော် (အပိုင်း နှစ်)

 ခမာနှစ်သစ်ကူးပွဲတော် အပိုင်း တစ် ကို ဖတ်ချင်ရင် ဒီမှာ နှိပ်ပါ။

(နှစ်သစ်ကူး သုံးရက်လုံးမှာ အိမ်တွေ၊ ဘုန်းကြီးကျောင်းတွေ၊ ရုံး၊ ကျောင်း၊ နန်းတော်၊ အစိုးရဌာန အဆောက်အဦးတွေ၊ ဟော်တယ်တွေ အားလုံးမှာ မီးပုံးတွေ ချိတ်ဆွဲထွန်းညှိကြပါတယ်။)

ဘုန်းကြီးကျောင်း အ၀င်ဝမုခ်ဦး





ဆက်ပြီးတော့ ခမာနှစ်သစ်ကူးပွဲကို ဘာသာရေး၊ လူမှုရေး၊ ယဉ်ကျေးမှု ဓလေ့ထုံးတမ်း အစဉ်အလာတွေအရ ဘယ်လိုဆင်နွဲကျင်းပလေ့ရှိကြတယ် ဆိုတာလေးတွေကိုပြောပြချင်ပါတယ်။ ပထမဆုံး ခမာနှစ်သစ်ကူးကို ဘာသာရေးအရ ကျင်းပပုံလေးတွေကို အရင်ဆုံးပြောပြမယ်နော်။ ခမာနှစ်သစ်ကူးပွဲတော် သုံးရက်မှာမှ တစ်ရက်ချင်းစီမှာ ဘာသာရေးနဲ့ရိုးရာဓလေ့အရ သူ့နေ့နဲ့သူလုပ်ရတဲ့ ထုံးတမ်းစဉ်လာ လုပ်ဆောင်ချက်တွေ ရှိပါတယ်။
 
နှစ်သစ်ကူးပွဲတော်ရဲ့ ပထမဦးဆုံးနေ့ကို မဟာ ဆောင်ကရန် (Maha Songkran)၊ ဒုတိယနေ့ကို ၀ီရ ၀ါဏဘ (Virak Wanabat) နဲ့ တတိယနေ့ကို ထငိုင်း လေယန် ဆာကာ (Tngay Leang Saka) လို့ ခမာလို ခေါ်ပါတယ်။ 

မဟာ ဆောင်ကရန်လို့ခေါ်တဲ့ နှစ်သစ်ကူးပွဲတော် ပထမနေ့ဟာ နှစ်ဟောင်းရဲ့ နောက်ဆုံးနေ့ဖြစ်သလို တပြိုင်နက်ထဲမှာပဲ နှစ်သစ်ရဲ့ ပထမဦးဆုံးနေ့လဲဖြစ်တာကြောင့် အဲဒီနေ့နှစ်သစ်ကူးပြောင်းတဲ့ အချိန်မှာ နှစ်သစ်နတ်သမီးဟာ လူ့ပြည်ကို ဆင်းသက်ရောက်ရှိလာမှာဖြစ်တဲ့အတွက် ခမာလူမျိုးတွေအတွက်တော့ မဟာဆောင်ကရန်နေ့ဟာ ရှေ့လာမယ့် နှစ်သစ်အတွက် အရေးကြီးတဲ့နေ့လို့ ဆိုရင် မမှားပါဘူး။

မဟာ ဆောင်ကရန်နေ့မှာ ခမာလူမျိုးတွေရဲ့ အိမ်တိုင်းမှာ နတ်သမီး ဆင်းသက်လာတာကို ကြိုဆိုဖို့အတွက် အိမ်ရှေ့မှာ စားပွဲခင်းပြီး ကန်တော့ပွဲပြင်ရပါတယ်။ အဲဒီကန်တော့ပွဲမှာ အဓိက အနေနဲ့ မိမိတို့ နှစ်သက်ရာပန်းများနဲ့ ထိုးထားတဲ့ နှစ်သစ်ကူးပွဲတော်ပန်းအိုး၊ ငှက်ပျောဖီး၊ အအေးဗူး ဒါမှမဟုတ် အချိုရည်ပုလင်းများ၊ ခမာလို ဘေဆေး (Baysey) လို့ခေါ်တဲ့ နှစ်သစ်ကူး ကန်တော့ပွဲ အတွက် ငှက်ပျောအူနဲ့ပြုလုပ်ထားတဲ့ ကန်တော့ပွဲ အဆင်တန်ဆာ တစ်စုံနဲ့ အုန်းလက်တံလေးတွေထိပ်မှာ ချိတ်ဆွဲတပ်ဆင်ရတဲ့ စက္ကူအရောင်စုံကို ပုံဖေါ်ညှပ်လုပ်ထားတဲ့ တံခွန်ကုက္ကားတွေဟာ နှစ်သစ်ကူး ကန်တော့ပွဲရဲ့ မပါမဖြစ် အရေးကြီးတဲ့ ပစ္စည်းတွေပေါ့။

ငှက်ပျောအူ ဘေဆေးလေးတွေပါ။
လမ်းဘေးမှာ ကန်တော့ပွဲအတွက် ဘေဆေးလုပ်ရောင်းနေတဲ့ မိသားစု
စက္ကူရောင်စုံ တံခွန်ကုက္ကားလေးတွေပါ။
ဒီလိုချိတ်ထားပြီးသားလေးတွေလဲ ၀ယ်လို့ရပါတယ်။

အိမ်တစ်အိမ်ရှေ့က ရိုးရိုးရှင်းရှင်း ကန်တော့ပွဲ

ဒါကတော့ စားသောက်ဆိုင်တစ်ခုရဲ့ ဆိုင်ရှေ့ အ၀င်ဝမှာ ပြင်ထားတဲ့ ကန်တော့ပွဲ။

ကန်တော့ပွဲအတွက် ဘေဆေးကိုပြင်ဆင်ရာမှာ လိုအပ်တဲ့ အဓိကပစ္စည်းတွေကတော့ ငှက်ပျောအူ၊ ကွမ်းရွက် ငါးရွက်၊ ကွမ်းသီးနုနုတစ်လုံး၊ ဖယောင်းတိုင် တစ်တိုင်နဲ့ အမွှေးတိုင် သုံးတိုင် တို့ကမပါမဖြစ်ပေါ့။ အဲဒါတွေအပြင် ဘေဆေးကို အလှဆင်ချင်တယ်ဆိုရင်တော့ အရံပစ္စည်းတွေ အနေနဲ့ ငှက်ပျောရွက်၊ ကွမ်းရွက်များ၊ ကြိုက်နှစ်သက်ရာ ပန်းပွင့်ပန်းဖူးလေးများကို အသုံးပြုပြီး ငှက်ပျောဖူး ဘုံဆင့်လေးတွေပုံစံပြင်ဆင်နိုင်ပါတယ်။

ဘေဆေးလုပ်ဖို့ ငှက်ပျောအူများ

ငှက်ပျောရွက်ကလေး ဖက်ကတော့ထိုးလို့...
ဒီလိုလေး အလှဆင်

အလှဆင်ပြီးရောင်းဖို့ အသင့်
စိတ်ရှည်လက်ရှည်
ဝယ်ကြအုံးမလား

ဘေဆေးလေးတွေရယ်၊ တံခွန်ကုက္ကား ရောင်စုံလေးတွေရယ်
 အဲဒီ ဘေဆေးကို ဘုံတစ်ဆင့်၊ ဘုံသုံးဆင့်၊ ဘုံငါးဆင့်၊ ဘုံခုနစ်ဆင့်နဲ့ ဘုံကိုးဆင့်အထိ ပုံစံ အမျိုးမျိုးနဲ့ပြုလုပ်ရောင်းချလေ့ ရှိကြပါတယ်။ ကန်တော့ပွဲမှာ ကြိုက်နှစ်သက်ရာ ဘေဆေးတစ်စုံတော့ အနည်းဆုံးပါဝင်ရပြီး အချို့ကတော့ ဘုံဆင့်ကလေးတွေကို တစ်မျိုး တစ်စုံစီနဲ့ နှစ်စုံ သုံးစုံ ထည့်ကြတဲ့သူတွေလည်း ရှိပါတယ်။ တစ်ချို့ကတော့ ဘေဆေးကို အုန်းစိမ်းနုနုနဲ့လဲ ပြုလုပ်ကြပါတယ်။ တစ်ချို့ တတ်နိုင်သူများကတော့ ငှက်ပျောအူနဲ့မဟုတ်ပဲ ရွှေစက္ကူ ငွေစက္ကူတွေနဲ့ လှလှပပ လုပ်ထားတဲ့ Ready Made ဘေဆေးတွေကို သုံးကြတာမျိုးလဲရှိပါတယ်။ အဲဒါမျိုးတွေကတော့ ဒီနှစ်ပြီးရင် ပြန်သိမ်းထားပြီး မပျက်စီးမချင်း နောက်နှစ်တွေမှာလဲ ဆက်ပြီးသုံးလို့ရပါတယ်။ ကန်တော့ပွဲပြင်ရမဲ့နေ့မှာဆိုရင် ဘေဆေးတွေ၊ ပန်းတွေ၊ တံခွန်ကုက္ကားတွေကို လမ်းဘေး သွားလေရာမှာ ယာယီဈေးတန်းကလေးတွေခင်းပြီး ချရောင်းနေကြတာတွေ တွေ့နိုင်ပါတယ်။

ကြိုက်တာယူပါ။
ဒါကတော့ အုန်းသီးနဲ့

အုန်းစိမ်းဘေဆေး တစ်စုံ

အဖွားဆီက ၀ယ်ပါအုံးကွယ်။
သမီးတို့ဆီကလဲ ၀ယ်အုံးနော်။

ဘေဆေး နှစ်စုံကို တစ်ထုပ်ရောင်းတယ်။
ဒုံးပျံမဟုတ်ဘူးနော်။ ဘေဆေးဘုံဆင့်တွေ... ၁ဆင့် ၃ဆင့် ၅ဆင့်
ဝယ်ပါအုံး။
ကန်တော့ပွဲအတွက် လိုအပ်တာတွေဝယ်ဖို့ စည်ကားနေတဲ့ ယာယီဈေးတန်းလေး
ပန်းသည်
ဒါကတော့ Ready made ဘေဆေးနဲ့ ကန်တော့ပွဲ

နှစ်သစ် ကန်တော့ပွဲမှာ အဲဒါတွေအပြင် အထူးအနေနဲ့ကတော့ အဲဒီနှစ်မှာ ဆင်းသက်လာမယ့် အလှည့်ကျ နတ်သမီး နှစ်သက်တတ်တဲ့ ပစ္စည်းတွေကို သင်္ကြန်စာထဲမှာ တွက်ချက် လမ်းညွှန်ထားတဲ့ အတိုင်း ပြင်ဆင်ပြီး ထည့်ပေးရပါတယ်။ ချမ်းသာတဲ့သူ ငွေကြေး တတ်နိုင်သူတွေကတော့ ကန်တော့ပွဲမှာ အဲဒီပစ္စည်းတွေအပြင် တခြား ကိုယ်နှစ်သက်ရာ ရိုးရာမုန့်ပဲသွားရေစာတွေ၊ ကိတ်တွေ၊ မုန့်ပုံးတွေ၊ နို့ဆီဗူးတွေ၊ စည်သွတ်ဗူးတွေအပြင် သစ်သီးဝလံတွေကို အမျိုးစုံတကာ့စုံအောင် ထပ်ထည့်တတ်ကြပြီး ကန်တော့ပွဲကို မိမိတို့ တတ်နိုင်သလောက် အခမ်းနားဆုံးဖြစ်အောင် ပြင်ဆင်ကြပါတယ်။ ကန်တော့ပွဲ ပြင်ပြီးနောက်မှာတော့ တအိမ်သားလုံးလည်း ရေမိုးချိုး အ၀တ်အစား သစ်သစ်လွင်လွင် ၀တ်စားထားကြပြီး နှစ်သစ် နတ်သမီးကို ကြိုဆိုဖို့ အဆင်သင့်ပြင်ဆင်ထားကြပါတယ်။ 

ဈေးထဲမှာ ကန်တော့ပွဲပြင်ဖို့အတွက် ရောင်းနေတဲ့ ပစ္စည်းတွေ



ကန်တော့ပွဲများ







သင်္ကြန်စာထဲမှာ တွက်ချက်ဖေါ်ပြထားတဲ့ နတ်သမီး လူ့ပြည်ကို ဆင်းသက်လာမယ့် အချိန်နာရီ ရောက်ရင် ရေဒီယို၊ ရုပ်မြင်သံကြားတွေကနေ Count Down လုပ်ပြီး နတ်သမီး လူ့ပြည်ကို ဆင်းသက်လာပြီဖြစ်ကြောင်း ကြေငြာပေးသလို ဘုရား၊ စေတီ၊ ဘုန်းတော်ကြီးကျောင်းတွေကလည်း နတ်သမီးဆင်းသက်လာတာကို ကြိုဆိုဖို့ သတိပေးတဲ့ အနေနဲ့ ဆင်းလာမယ့် အချိန်အတိအကျမှာ တုံးမောင်းခေါက်တာ၊ မောင်းတီးတာ၊ စည်တီးတာမျိုးတွေ ပြုလုပ်ပေးကြပါတယ်။ အဲဒါဆိုရင် မိသားစုဝင်တွေ အားလုံး ကန်တော့ပွဲရှေ့မှာ စုရုံးကြပြီး အဆင်သင့်ပြင်ထားတဲ့ ဖယောင်းတိုင် အမွှေးတိုင်များကို မီးထွန်းညှိ ပူဇော်ကာ လာမယ့်နှစ်သစ်မှာ ဘေးအန္တရာယ်တွေ ကင်းဝေးစေဖို့၊ ကျန်းမာ အသက်ရှည်ဖို့၊ ကံကောင်းစေဖို့၊ အကျိုးစီးပွားလာဘ်လာဘများ တိုးတက်ဖြစ်ထွန်းစေဖို့ စတာတွေကို နှစ်သစ်နတ်သမီးထံ တောင်းဆုပြုကြပါတယ်။ နတ်သမီးကို ကြိုဆိုတဲ့အနေနဲ့ တအိမ်လုံးကိုလည်း အမွှေးနံ့သာရေတွေ ရေမွှေးတွေနဲ့ ဖျန်းပက်ကြပါတယ်။ မိမိတို့အိမ်က ဘုရားစင်၊ နတ်စင် နတ်ကွန်း၊ ရိုးရာစင်မှန်သမျှမှာလဲ ဖယောင်းတိုင် အမွှေးတိုင်တွေ တပြိုင်နက် ထွန်းညှိပူဇော်ကြပါတယ်။

ဘုန်းကြီးကျောင်းက စည်ကြီး။ (အဲဒီစည်ကို မြန်မာပြည်က တုံးမောင်းခေါက်တဲ့ စည်းချက်အတိုင်း တီးကြတယ်။ ခမာတွေက  ဘုန်းကြီးကျောင်းတွေမှာ တုံးမောင်းအစား စည် သို့မဟုတ် မောင်း အကြီးကြီးတွေကို သုံးတယ်။)
ဘုန်းကြီးကျောင်းက ပြင်ဆင်ထားတဲ့ နှစ်သစ်ကူး ကန်တော့ပွဲ
ခမာလူမျိုးတွေရဲ့ အိမ်တိုင်းမှာ မရှိမဖြစ် ရိုးရာနတ်စင်။ နှစ်သစ်ကူးအတွက် အထူးတလည် အအေးဗူးရယ် အသီးအနှံရယ် တင်ထားပုံ။
ခမာလူမျိုးတွေရဲ့ ယုံကြည်မှုအရ နှစ်သစ်ကူးမှာ အလှည့်ကျနတ်သမီး ကောင်းကင်ဘုံမှ ဆင်းသက်လာပုံလေးကို ပြောပြရရင် ခမာတို့ရဲ့ သင်္ကြန်စာအရ ၂၀၁၂ ခုနှစ်ဟာ ခမာခုနှစ်အနေနဲ့ ၂၅၅၆ ဗုဒ္ဓသာသနာ သက္ကရာဇ် နဂါးနှစ်ပါ။ မဟာ ဆောင်ကရန်နေ့က သောကြာနေ့မှာ ကျရောက်တဲ့အတွက် လူ့ပြည်ကို ဆင်းသက်ဖို့ တာဝန်ကျတဲ့ သမီးတော်ကတော့ ခေမရာဒေဝီ (Kemera Devi) လို့ ခေါ်တဲ့ သောကြာနေ့ကို ကိုယ်စားပြုတဲ့ နတ်သမီး (Friday Angel) ရဲ့အလှည့်ဖြစ်ပါတယ်။ မဟာ ဆောင်ကရန်နေ့ ၂၀၁၂ ဧပြီလ ၁၃ရက် သောကြာနေ့ ညနေ ၇ နာရီ ၁၁ မိနစ် တိတိဟာ နှစ်သစ်ကို ကူးပြောင်းချိန်ဖြစ်ပါတယ်။ ကျရောက်လာတဲ့ နှစ်သစ်ဟာ နဂါးနှစ်ဖြစ်လို့ နတ်သမီး လူ့ပြည်ကိုဆင်းရာမှာ ရှေ့တော်ပြေးအဖြစ် နှစ်သစ်ကို ကိုယ်စားပြုတဲ့ နတ်နဂါးတစ်ကောင်က ဦးဆောင်လာပြီး အဲဒီနောက်ကနေ သောကြာနတ်သမီးဟာ ညာလက်မှာ ဓါးတစ်လက်နဲ့ ဘယ်လက်မှာ ပင်း (Peng) လို့ခေါ်တဲ့ ခမာရိုးရာ တူရိယာ တစ်မျိုးကို ကိုင်စွဲကာ ကျွဲစီးပြီး လူ့ပြည်ကို ဆင်းသက်လာပါတယ်။ နတ်သမီးရဲ့ နောက်မှာ နောက်လိုက်နောက်ပါ အခြွေအရံ သင်းပင်းများက ဗြဟ္မာကြီးဦးခေါင်းကိုတင်ထားတဲ့ ရွှေကလပ်နဲ့အတူ လူ့ပြည်ကို လိုက်ပါ ဆင်းသက်လာကြပါတယ်။

ခမာလူမျိုးတွေရဲ့ မဟာဆောင်ကရန်စာအုပ် (သင်္ကြန်စာ) မျက်နှာဖုံးမှာ ပုံဖေါ်ထားတဲ့ နဂါးနှစ်အတွက် နတ်သမီးဆင်းလာပုံ သရုပ်ဖေါ်ပုံ။ (ဒီပုံကိုတော့ အင်တာနက်ကပဲ ရှာယူထားပါတယ်။)

သောကြာနတ်သမီးဟာ ဗြဟ္မာကြီးဦးခေါင်းကို သယ်ဆောင်ပြီး ထုံးတမ်းစဉ်လာအတိုင်း မေယုတောင်ကို မိနစ် ခြောက်ဆယ်ပြည့်အောင် ပတ်ပြီးတဲ့အခါမှာ လူ့ပြည်က တာဝန်အလှည့်ပြီးဆုံးလို့ မူလနေထိုင်ရာကောင်းကင်ဘုံကို ပြန်လည်ထွက်ခွာတော့မယ့် နှစ်ဟောင်းက နတ်သမီးထံ ဗြဟ္မာကြီးဦးခေါင်းကို လွှဲပြောင်းပေးအပ်ပါတယ်။ အဲဒီနောက် နှစ်ဟောင်းနတ်သမီးဆီက လူ့ပြည်မှာထမ်းဆောင်ရမယ့်တာဝန်တွေကို တနှစ်တာအတွက် လွှဲပြောင်းလက်ခံယူရပါတယ်။ အဲဒီနောက်မှာတော့ တနှစ်တာတာဝန်တွေ ထမ်းဆောင်ပြီးဆုံးပြီဖြစ်တဲ့ နှစ်ဟောင်းကနတ်သမီးဟာ နှစ်သစ်နတ်သမီးကို နှုတ်ဆက်ပြီး လက်လွှဲယူထားတဲ့ ဗြဟ္မာကြီးဦးခေါင်းကို သယ်ဆောင်ကာ နောက်လိုက်နောက်ပါများနဲ့အတူ မိမိရဲ့မူလနေရာ ကောင်းကင်ဘုံကို ပြန်လည်ထွက်ခွာသွားပါတယ်။ နဂါးနှစ်အတွက် တာဝန်ကျတဲ့ သောကြာနတ်သမီး ခေမရာဒေဝီကတော့ တနှစ်တာ တာဝန်တွေကို ထမ်းဆောင်ဖို့အတွက် လူ့ပြည်မှာနေထိုင်ပြီး နောက်နှစ် နှစ်သစ်ကူးချိန် အလှည့်ကျတဲ့နတ်သမီး ဆင်းသက်လာချိန်တိုင်အောင် ရှိနေမှာဖြစ်ပါတယ်။

မဟာ ဆောင်ကရန်နေ့မှာ ခမာလူမျိုးများအားလုံး ရိုးရာယုံကြည်မှုဓလေ့အရ တနှစ်တာလုံး ပျော်ရွှင်ကံကောင်းစေဖို့ ရည်ရွယ်ပြီး မနက်စောစောမှာ ရေစင်(Holy water)နဲ့ မျက်နှာသစ်ခြင်း၊ နေ့လည်မှာ ကိုယ်ခန္ဓာကို ဆေးကြောရေလောင်းခြင်းနဲ့ ညအိပ်ရာမ၀င်ခင်မှာခြေဆေးခြင်း တို့ကိုလည်းပြုလုပ်ကြပါတယ်။ ဘုန်းကြီးကျောင်းတွေမှာတော့ ဘုန်းတော်ကြီးတွေက ဦးဆောင်ပြီး အားလုံးစုပေါင်းပါဝင်ကာ ကျောင်းဝင်းအတွင်း မျက်နှာစာ မြေကွက်လပ်မှာ နှစ်သစ်ကူး အစဉ်အလာ ထုံးတမ်းများအတိုင်း သဲများနဲ့ သဲပုံစေတီတွေ စုစုပေါင်း ငါးဆူတည်ရပါတယ်။ အလယ်မှာ စေတီတစ်ဆူရှိပြီး အခြားစေတီလေးဆူက ထောင့်လေးထောင့်ကနေ ၀န်းရံထားတဲ့ပုံစံမျိုး တည်ဆောက်ရပါတယ်။ အလယ်စေတီက ဗုဒ္ဓဘုရားရှင် ကိုယ်တော်တိုင်ကို ကိုယ်စားပြုသလို တာဝတိံသာမှာရှိတဲ့ ဘုရားရှင်ရဲ့ ဓါတ်တော်များကို ဌာပနာထားသော စကြမုနိစေတီတော်ကို ကိုယ်စားပြုတယ်လို့လဲ ပြောကြပါတယ်။ အရံစေတီလေးဆူကတော့ ဘုရားရှင်ရဲ့ သာဝက ရဟန်းတော် လေးပါးဖြစ်တဲ့ ရှင်သာရိပုတ္တရာ၊ ရှင်မောဂ္ဂလာန်၊ ရှင်အာနန္ဒာနဲ့ ရှင်မဟာကဿပကို ကိုယ်စားပြုတယ်လို့ ဆိုပါတယ်။ သဲပုံစေတီတွေအားလုံးကို ရာဇမတ်ကာ၊ သာသနာ့အလံစိုက်၊ ရွှေထီးများမိုးပြီး အလှဆင်ပန်းကုံးများ မီးရောင်စုံများနဲ့ အလှဆင်ပူဇော်ထားကြပါတယ်။ နှစ်သစ်ကူးသုံးရက်အတွင်းမှာ ဘုန်းကြီးကျောင်းကို လာရောက်လှူဒါန်းပူဇော် ကုသိုလ်ပြုကြသူများအားလုံး သဲပုံစေတီတွေကို အရောင်စုံ တံခွန်ကုက္ကားလေးများ ထိုးစိုက်ပြီး ဖယောင်းတိုင် အမွှေးတိုင်များ ထွန်းညှိပူဇော်လေ့ ရှိကြပါတယ်။

ဘုန်းကြီးကျောင်းဝင်းအတွင်းက တည်ပြီးစ သဲပုံစေတီများ
အဲဒီမုခ်ဦးအခုံးကလေးတွေက အုန်းလက်တွေကို ဖွတ်မြီးကျစ်သလိုကျစ်ပြီးလုပ်ထားတာ

သဲပုံစေတီ အနောက်ဖက်ခြမ်း
အလယ်ကစေတီနဲ့ အရံစေတီလေးဆူ
အလယ်စေတီရဲ့ မျက်နှာစာဖက်
သဲပုံစေတီ အရှေ့ဖက်ခြမ်း မျက်နှာစာ
ဒီပုံမှာတော့ ပူဇော် ကန်တော့ကြတဲ့သူတွေ ထိုးစိုက်သွားကြတဲ့ ရောင်စုံ တံခွန်လေးတွေ မြင်နိုင်ပါတယ်။
အလယ်စေတီ အရှေ့မျက်နှာစာ အနီးကပ်
အမွှေးတိုင်များ တံခွန်ကုက္ကားများနဲ့ ပူဇော်ထားကြတဲ့ သဲပုံစေတီများ

ဝီရ ဝါဏဘ လို့ခေါ်တဲ့ နှစ်သစ်ကူး ဒုတိယနေ့ကတော့ ပေးကမ်း စွန့်ကြဲ လှူဒါန်းရတဲ့နေ့ပါပဲ။ အဲဒီနေ့မှာ မရှိဆင်းရဲ နွမ်းပါးသူများ၊ သက်ကြီးရွယ်အိုများ၊ အိမ်မဲ့ယာမဲ့မိသားစုများ၊ မိမိတို့ လက်အောက်ငယ်သားများကို တတ်နိုင်သလောက် ပေးကမ်း စွန့်ကြဲ ကူညီထောက်ပံ့မှုများ ပြုလုပ်ကြတဲ့အပြင် ဘုရား ကျောင်းကန်များကို သွားရောက်လှူဒါန်းခြင်းများလဲ ပြုတတ်ကြပါတယ်။ ကွယ်လွန်ပြီးသော မိဘ ဘိုးဘွားများအတွက် ရည်စူးပြီးတော့ ဆွမ်းကပ်လှူခြင်း၊ ကောင်းမှုကုသိုလ်များ ပြုလုပ်ပေးခြင်း၊ အလှူဒါနပေးခြင်း၊ ဘုရားကျောင်းကန် သင်္ချိုင်း အုတ်ဂူများမှာ သွားရောက်ပြီး ဆုတောင်း ပူဇော်ပေးခြင်း၊ မိမိတို့ပြုလုပ်သမျှသော ကောင်းမှုကုသိုလ်များကို ကွယ်လွန်ပြီးသူများအား ရည်စူး၍ အမျှအတန်း ပေးဝေခြင်းတွေကိုလဲ လုပ်ကြပါတယ်။ ငွေကြေးတတ်နိုင်သူများကတော့ ရပ်နီးရပ်ဝေးက ဘိုးဘွား မိဘ ဆွေမျိုးများ၊ ဆရာသမားများ၊ ခင်မင်ရင်းနှီးသော မိတ်ဆွေများ၊ အိမ်နီးနားချင်းများကို သစ်သီးခြင်းများ၊ လက်ဆောင်ခြင်းများ၊ အခြားနှစ်သက်ရာ နှစ်သစ်ကူးလက်ဆောင်များ ပေးတတ်ကြပါတယ်။

နှစ်သစ်ကူးလက်ဆောင်

ခမာသီလရှင်အဖွားများ နှစ်သစ်ကူးမှာ ဘုရားကျောင်းကန်သွားကြတာပါ။


ဒါတွေကတော့ ဘုန်းကြီးကျောင်းဝင်းအတွင်းက သင်္ချိုင်းအုတ်ဂူတွေပါ။ များသောအားဖြင့် ဆွေစဉ်မျိုးဆက် အရိုးပြာအိုးများကို မြုပ်နှံထားတတ်ကြပါတယ်။ အရောင်စုံ စက္ကူလေးတွေကပ်ထားတာကတော့ သင်္ချိုင်းဂူကို လာရောက်ပူဇော် ထားကြတာပါ။

နှစ်သစ်ကူး ဒုတိယနေ့မှာ လမ်းဘေးတစ်နေရာမှာ အလှူခံနေကြတဲ့ သက်ကြီးရွယ်အိုများ။

ဘုန်းကြီးကျောင်းဝင်းအတွင်းက နှစ်သစ်ကူးအတွက် ချပေးထားတဲ့ အလှူခံပုံးနဲ့ အမွှေးတိုင်ပူဇော်တဲ့နေရာ

အလှူလဲထည့် ချပေးထားတဲ့ အမွှေးတိုင် ဖယောင်းတိုင်များကိုလည်း ထွန်းညှိပူဇော်

အလှူခံပုံးနောက်က စင်ပေါ်မှာ ရေသပ္ပါယ်နိုင်ဖို့ ဆင်းတုတော်တစ်ဆူကို ရေပုံးရေခွက်များနဲ့ အဆင်သင့် ပြင်ဆင်ထားပေးပါတယ်။
တတိယနေ့ဖြစ်တဲ့ ထငိုင်းလေယန်ဆာကာနေ့ကတော့ ဗုဒ္ဓဆင်းတုတော်များ၊ ဘုရားစေတီများကို ရေသပ္ပါယ်ရတဲ့နေ့ဖြစ်ပါတယ်။ တတိယနေ့ဆိုရင် ဘုရားစေတီတွေ ဘုန်းတော်ကြီးကျောင်းတွေမှာ လူတွေကြိတ်ကြိတ်တိုးနေတတ်ကြပါတယ်။ အဲဒီနေ့မှာတော့ စေတီပုထိုး ဘုရားကျောင်းကန်များမှာရှိတဲ့ ဗုဒ္ဓဆင်းတုတော်များကို အမွှေးနံ့သာရေများနဲ့ဆေးကြော သန့်စင်ကြပြီး ရေသပ္ပါယ်ကြပါတယ်။ ကမ္ဘောဒီးယားက အချို့နယ်ဖက်တွေမှာဆိုရင် မီးသတ်ဌာနက ကားများနဲ့ မီးသတ်ပိုက်များကို ငှားရမ်း အသုံးပြုပြီး ဘုရား စေတီငယ်များကိုပါ ထီးတော်ကနေ ဖိနပ်တော်အထိအောင် ရေပက်ဖျန်းပြီး ဆေးကြောသန့်စင်လေ့ ရှိတတ်ကြကြောင်းကိုလဲ ကြားသိရဖူးပါတယ်။ ခမာလူမျိုးတွေအနေနဲ့ နှစ်သစ်ကူးချိန်မှာ ဗုဒ္ဓဆင်းတုတော်များကို ရေသပ္ပါယ်ရတဲ့ ရည်ရွယ်ချက်ကတော့ လောကမှာ ရှိရှိသမျှသော သက်ရှိသတ္တဝါများ၊ အပင်များအားလုံး အသက်ရှင်ဖို့အတွက် ရေဟာမရှိမဖြစ် အရေးပါတဲ့ လိုအပ်ချက်တစ်ခု ဖြစ်ကြောင်း အထိမ်းအမှတ် သင်္ကေတကို ဖေါ်ပြတာပဲ ဖြစ်ပါတယ်တဲ့။ အဲဒီလို ရေသပ္ပါယ်ရတဲ့ ကုသိုလ် အကျိုးဆက် အနေနဲ့ကတော့ အသက်ရှည် အနာကင်းခြင်း၊ ကံကောင်းခြင်း၊ စိတ်သောကကင်းပြီး ပျော်ရွှင်ချမ်းမြေ့ခြင်း၊ ပြည့်စုံကြွယ်ဝသော ဘဝကို ပိုင်ဆိုင်ခွင့်ရခြင်း အစရှိတဲ့ ကောင်းကျိုးချမ်းသာတွေ ရရှိနိုင်တယ်လို့ ခမာလူမျိုးများက ယုံကြည်ကြပါတယ်။ နှစ်သစ်ကူးပွဲတော်ရဲ့ တတိယမြောက်နေ့မှာ ဗုဒ္ဓရုပ်ပွားတော်များကို ရေသပ္ပါယ်ခြင်းအပြင် ခမာတို့ရဲ့ ရိုးရာဓလေ့ ထုံးတမ်းစဉ်လာအရ ခမာမိသားစုများဟာ အိမ်မှာ အဘိုး အဘွား မိဘများကို အမွှေးနံ့သာရေများနဲ့ ခြေထောက်ဆေးပေးခြင်း၊ ရေချိုးပေးခြင်းများ ပြုလုပ်ကြပြီး လူကြီးများအပေါ် မိမိတို့ ကံသုံးပါးဖြင့် မှားယွင်းခဲ့သည်များ ရှိပါက ခွင့်လွှတ်ရန် ဝန်ချတောင်းပန်ကြပါတယ်။ အဲဒီလို ဝန်ချတောင်းပန်ခြင်းအားဖြင့် ဘိုးဘွားမိဘများထံမှ ဆုမွန်ကောင်းများ ရရှိခြင်း၊ ဘဝအတွက် မှတ်သားထိုက်သော ဆိုဆုံးမစကားများကို လက်ခံနာယူခွင့်ရခြင်းတို့ကြောင့် မိမိတို့ ရှေ့ဆက်ရမယ့် ဘ၀အတွက် အဖိုးတန်သော ဆောင်ရန်ရှောင်ရန် အတွေ့အကြုံများ၊ အကြံဥာဏ်ကောင်းများကို မျိုးဆက်သစ်တွေက လူကြီးများထံမှ လက်ဆင့်ကမ်း ရရှိနိုင်ကြပါတယ်။ အဲဒီ ရိုးရာဓလေ့ရဲ့ကောင်းကျိုးများကြောင့် လူကြီးသူမများရဲ့ အတွေ့အကြုံ ဆိုဆုံးမစကားတွေကို ခမာလူမျိုးတွေဟာ ရှေးယခင်ကတည်းက မိမိတို့ရဲ့ နောင်လာနောက်သား လူငယ်မျိုးဆက်သစ်တွေဆီကို ယနေ့အချိန်ထိတိုင်အောင် တစ်ဆက်ပြီးတစ်ဆက် နှုတ်အားဖြင့် ဆက်လက်ပြီး လက်ဆင့်ကမ်းလာခဲ့ရင်းဖြင့်  ခမာလူမျိုးတို့ရဲ့ ရိုးရာအစဉ်အလာ ဓလေ့ထုံးတမ်းများ၊ ယဉ်ကျေးမှု အမွေအနှစ်များ၊ လိုက်နာ စောင့်ထိန်းအပ်သော ကျင့်ဝတ်များကို အနာဂါတ်မှာ မပျောက်မပျက်သွားရအောင် ဆက်လက်ပြီး ထိန်းသိမ်း လာနိုင်ခဲ့ကြတယ်လို့ ယုံကြည်ထားကြပါတယ်။

ကူးလင်းကျောက်တောင်ပေါ်က ကျောက်ဖျာချပ်ကြီးအောက်က ရုပ်ပွားတော်များနဲ့ ရင်ပြင်ပေါ်က နှစ်သစ်ကူး ကန်တော့ပွဲ
 


ကူးလင်းတောင်ပေါ်က ရုပ်ပွားတော်

ရွှေရောင် ငွေရောင် အချွန်အတက်များက Ready made ဘေဆေးတွေဖြစ်ပါတယ်။
အနီးကပ်ရိုက်ထားပါတယ်။

နှစ်သစ်ကူးပွဲတော်အတွက် အလှူခံပုံးနဲ့ ဆင်းတုတော် ရေသပ္ပါယ်ရာ ယာယီစံနန်းလေး
 



ဘီလူးစောင့်တဲ့ ဇရပ်
(ကြည့်ရတာ သေးနေရင် ပုံတွေကို ကလစ်နှိပ်ကြည့်လို့ရပါတယ်။)


(ဆက်ရန်)


အမြဲတမ်း ငြိမ်းချမ်းကြပါစေ။

9 comments:

8Yar said...

အစ်မအိမ်သူရေ ဗဟုသုတတွေ အများကြီးရသွားပါတယ်ခင်ဗျာ။ ကျေးဇူးပါ။

နေ၀သန် said...

မသိသေးတာတွေ အများကြီးသိသွားပါတယ် အစ်မရေ..။ ယဉ်ကျေးမှုတွေက အတော်ကို ဆင်တူကြတာပဲနော်..။ ခမာပြည်ကိုကြည့်ရင်းနဲ့ ရှမ်းပြည်နဲ့သိပ်တူတာပဲလို့ ခံစားမိတယ်..း)))

ခင်မင်လျက်
နေ၀သန်

စံပယ်ချို said...

ဟုတ်တယ်မအိမ်သူရေ
အသိတွေတိုးလာတယ်
တချို့ပုံလေးတွေက ပအို့ တို့အင်းသားတို့ နဲ့ဆင်တယ်နော်

mstint said...

ဗဟုသုတတွေ တစ်လှေကြီးရသွားတယ် မအိမ်သူရေ ဆက်ရန်လေးကို စောင့်စားနေတယ်နော်။
စကားမစပ် ဘုရားဖူးသွားတုန်းက မအိမ်သူရဲ့ လက်ဆောင်လေးကို အသုံးပြုခဲ့တယ်း)
စိတ်ဓာတ်အစဉ်ကြည်လင်အေးမြပါစေကွယ်။

မေတ္တာဖြင့်
အန်တီတင့်

SHWE ZIN U said...

မအိမ်သူ ရေ

စိတ်ဝင်စားစွာဖတ်သွားပါတယ် ကျေးကျေးနော် ညီမ
ပုံလေးတွေ နဲ့ သေချာရှင်းပြထားတာ ပင်ပန်းသွားမှာဘဲ

ချစ်တဲ့
အမရွှေစင်

ခရစ္စတလ် said...

သူတို့ရိုးရာတွေက ထိုင်းတွေနဲ့ တော်တော်တူတယ်နော်၊ အထူးအဆန်းလေးတွေ လာဖတ်သွားတယ် အစ်မရေ

မောင်ဘကြိုင်(ချဉ်ပေါင်ခြံ) said...

စိတ်ဝင်တစား ဖတ်ဖြစ်တယ်ဗျာ
ပုံတွေဝေဝေဆာဆာနဲ့
ကျေးဇူးပါ

san htun said...

ခမာသင်္ကြန်က ချစ်ဖို့ ကောင်းပြီး ယဉ်ကျေးလိုက်တာ...

Shinlay said...

ခမာတွေရဲ့ နှစ်သစ်ကူးပွဲ အကြောင်း ရှင်းပြပေး
တာကျေးဇူးတင်ပါတယ်။

Related Posts Plugin for WordPress, Blogger...